Hmmm no be small thing we dey see about this "one chance" theives ooo! Just one week ago, we hear say about 38 one chance syndicates na dem the police force bin parade and dem still con take style outline their tactics, so that all of us go dey very careful as we dey do our everyday waka... Make we also remind ourselves ontop these tactics wey dem bin talk, so that you and me go join hands spread the words make the one chance robbery stop kpatakpata; some of dem na;
- No ever accept free ride from any person wey you no ever know...
- No ever enter motor wey dey tinted( meaning say the glass dey black from outside)and if the glasses dey down, make sure say you attempt to whine am up before you enter o!
- No ever keep bank details like codes, account balance sms e.t.c for inside your phones (how much dey wey we no fit carry for head or ask our officer ehn?)
- Anyhow wey you fit ehn, try to avoid to dey waka around with ATM card wey you know say you no go need, especially the one wey you dey use for your savings.
- No ever allow yourself fall victim ontop some kind tactics wey dem dey use like when dem go talk say money wey person thief, full inside boot(that style na old school) or to stand dey watch fight. Oga/Madam take style talk sense give your leg sharp-sharp before dem trap you for there...
These na the ones wey i fit remember for now. But you fit still tell us some, so that we go dey aware and we fit learn con get sense ontop this "one chance" matter...
The kind hunger wey still full ground for we country ehn, na im dey make people dey desperate to do anything just because dem wan take style reduce the effect of this hunger wey dey catch dem...
Na only God go continue to guide us o.
...ALI INA...
