"My name na Daniel Boniface aka Holydanfilmz... I be Filmmaker"

For filmmaking, wetin people dey see and celebrate, na d efforts and work wey d Actor dey put inside so dat viewers go get betta pleasure with their eyes... But reality be say, much of d work na d people wey dey behind d Camera dey do am... Part of wetin we dey like do for dis blog na to celebrate every single member of every work of art and for every field of hussle wey dey exist for Naija... Today our guest na person wey don hussle behind Camera sotay him don become force to reckon with(as oyibo dey talk am)... Make we meet dis young man;

"My name na Daniel Boniface aka Holydanfilmz..."
Yes oooo today na Holydan turn. As plenty film people know am as d guy behind d camera wey professionally dem dey call 'Cinematographer'... E go good make we celebrate am bcoz d work wey him dey do, no be here ooo...  Make we continue d gist with Holydan... Him talk say; "dem born me for Abuja for January 30 1989, and na for GSS Garki, ABUJA, I go school..."  For d benefits of people wey no know who Holydan be, we con ask am, who him be, na so him tell us say;

"I be filmmaker..."
Omo! Dis guy no dey talk too much ooo, so to even extract 1 page information from am sef, na wahala... Him answers na straight to d point and for reality na straight forward person wey no like corner-corner him be... Ok as we take style move front small, we ask am say how long him don dey inside dis game, him yarn say; "na like 5years now..." Unto who him dey look forward to be like for d industry, him talk say; 

"seriously I be myself I no wan be like anybody..." Toh Holydan na one man army and him like am like dat... But as for how long him wan pursue dis career, him yarn say; "how long I want do am, na till God call meooo..." Unto wetin him go like leave wey go make people remember am, Holydan no waste time to say na; "good life.." OK as e be say time don dey give us signal, na so we sharperly ask am wether project dey wey him dey do or wey him moi body do? Him yarn say;

"Yes the project wey I join body with, na Face of Art Beauty Pageant/African giant strides awards wey Black Giant Signature bin organize" Toh as e don reach dis level naw, wetin be your advice to upcoming guys and babes wey go wan follow your path and wetin be your last words before we put full stop;

  "I want make dem understand one thing say d greatest barrier to success na the fear of failure... And wetin i go like talk be say una don try well well for this things wey una dey do because una help us grow the more God go bless una..." Una don hear am first hand from Daniel Boniface aka Holydanfilmz...

Incase you wan reach out to am, you fit comment under dis post or through him social media handles;

Facebook: holydanfilm 
Email: holydanfilm@gmail.com