ROSEMARIE PAMSIC (MISSY): "I bin take the lead for inside the movie STOLEN ROSE..."

We dey advocate for legitimate hustle... If you get good heart, click here 👉🏽http://legeerook.com/N6s 👈🏽 to encourage handwork for survival and discourage social vices!!!

Legitimate hussle don become d ingame for dis era and e make sense to see say plenty talented youths dey engage inside so many legitimate hussle because dem wan atleast take style contribute their own quota ontop nation building... And na d reason wey we dey always waka for Naija to find these kind talented youths so dat we fit celebrate dem and encourage dem to take style boost their morale... Anyway our guest for today na another talented youth wey don dey try for Nollywood for sometime now sotay she recently take lead role for one of her recent films... But as we dey always do am, make we allow our guest use her own mouth chop d onions(na im dey sweet pass...Lol!🤣😂🤣😂😂😂);

 "My name na Rosemarie Pamsic (Missy). My Papa and Mama born me for Beji, for 1997 and na Niger state I come from..." Hmm mm I hope say Niger state people dey see how their daughter dey make dem proud ooo as she no wan carry last inside dis her legit hussle... Make we continue sha. On top her educational background she talk say;

  "I bin attend Beji primary school, Government girls secondary School kaffi-koro Niger state, and National Open University Abuja from where I bin Study environmental science and toxicology..." Omo! Dis Niger young babe know d value of education ooo! See how far she don go... I twale for dis babe I swear! But make we continue sha... Na for here we con ask her say, because of people wey fit no know who she be, make she tel us who she be and wetin she dey do now... With her sweet Niger State pidgin voice, na so She sharperly talk say;

"I be Model and i be Screen Actor..." Ehen☺ she don use her mouth talk am and I sure say people especially Niger State people go wan know which films she don do but dat wan na later gist... On top wetin she go like to achieve with wetin she dey do, like say she don rehearse am well well, she sharperly talk again say;

"True true ehn, i go like achieve influence, Fame money and d kind things wey joinbody with these kind things..." Lol!😆😅 Na who know like betta thing na! Dis babe na correct open book wey no dey hide her mind... As we continue, na so we ask her say, as e be so, how far you don waka on top dis your legit hussle? To clear d minds of people wey wan know if she don dey act films tay tay before now, she respond say;

  "i don act inside reasonable number of films wey don commot as we dey talk... So I fit consider say my journey far already... Lol!" Okay, for dat case, on top dis level wey you dey so, who you fit say be person wey you dey look up to? Her answer shock me as e go shock you too because e dey rare to see us dey look up to dem but na d thing wey make Missy different be dis and to dey positively different for dis era wey we dey so, na betta thing... She talk say;

KIM CHIU

"Kim Chiu (wey be Philippino Actress)" Toh i know say many of us no go know her but make i help una small. Her real name na Kimberly Sue Yap Chiu and she be Chinese Filipino Actress, Singer, Recording Artist, and Television Host for the Philippines. If you need more info about Kim Chiu, no forget say Google na your friend... Lol!😁 As we continue na so we con ask her say na how long she precisely don dey pursue dis career and how far she dey hope to pursue am? She yarn say;

 "I don dey pursue am for three years now and I dey hope to pursue am for the rest of my life as  my career..." Hmmmm Missy really know wetin she want ooo! And we go always dey pray make God help her on top her legit hussle... Anyway, time no be our friend for dis point so we sharperly ask am say wetin she go like leave as legacy wey people go dey take remember her? She talk say; "I go like make people always remember me as dat girl wey bin start acting from nothing, con dey take extra roles for movies. And most of all make dem remember say, I no ever bin think of to give up..." Okay unto d betta part of our interview with Rosemarie Pamsic, we ask her say, we hear say she recently take lead role for her latest film, which film be dat?;

"Yes, I bin take the lead for inside the movie STOLEN ROSE..." Wow I don put am for head, I go dey wait for d release of d film and make all of una also anticipate for am... On top her experience for dat set, she talk say;

"D thing bin get as e be sha and some times we go stay for set dey shoot from morning till afternoon or so without food (walfare), some of us go even wound for d process of the shoot and all. But we go just get d mindset of say, we go make am one day... I no dey ever think of to give up..." Hmm dis wan don proof say to shoot film for Nigeria no easy ooo talk less of to pursue career as Actor for Nollywood... But we go always dey appreciate people like Rosemarie Pamsic and hope say as she dey keep hope alive, we sef go keep hope alive say Nollywood go betta pass d way e dey and these young talents go always dey celebrated... Before we match break for dis session, make we hear her advice to upcomers;

  "To upcomers wey dey read dis, make una know say, anything wey you believe in, anything wey you get passion for, go for am and make you no ever think of to give up..." Las las, she still talk say; "I go like to appeal to modeling agencies, I know say na showbiz but make dem no dey do am at the expense of another person. Yes. If we go dey take style welcome young talents and hardwork I believe say we go go FAR..." Toh una don hear am all from Rosemarie Pamsic (Missy), incase you wan chook mouth on top her matta, you fit do so under here and you fit also follow her on top her social media handles;
IG: officialmissy01

Twitter: @Rawgold🌹

Facebook: Mis Sy Rawgold